Píanódeildartónleikar Tónlistarskóla Árnesinga verða haldnir fimmtud. 7. nóvember 2019 kl. 18:00, í Þorlákskirkju. Á tónleikunum koma fram píanónemendur á öllum aldri og námsstigum, sem leika einleik, fjórhent og sexhent. Fjölbreytt og skemmtileg dagskrá.   Aðgangur að tónleikunum er ókeypis og allir hjartanlega velkomnir.

Rytmískir deildartónleikar Tónlistarskóla Árnesinga verða haldnir föstud. 8. nóvember 2019 kl. 17:30, í sal skólans Eyravegi 9 á Selfossi (3. hæð). Á tónleikunum koma fram allar rytmískar sveitir skólans, auk ýmiskonar samleiks, einleikara og gesta úr öðrum deildum. Fjölbreytt og skemmtileg dagskrá.   Aðgangur að tónleikunum er ókeypis og allir hjartanlega velkomnir.

Söngdeildartónleikar Tónlistarskóla Árnesinga verða haldnir mánud. 11. nóvember 2019 kl. 18:00, í Hveragerðiskirkju. Á tónleikunum fléttast saman einsöngur og samsöngur í fjölbreyttri og skemmtilegri dagskrá.   Aðgangur að tónleikunum er ókeypis og allir hjartanlega velkomnir.

Píanónemendur fá til sín góða gesti þann 16. nóvember, þegar um 30 píanónemendur Tónskóla Sigursveins koma í heimsókn. Nemendur beggja skóla æfa saman fjórhent og sexhent lög, sem verða svo flutt á tónleikum kl. 13:00 sama dag, í sal skólans að Eyravegi 9 á Selfossi.

Sunnudaginn 17. nóvember taka eldri blásarasveitir Tónlistarskóla Árnesinga á Selfossi og í Þorlákshöfn, þátt í lúðrasveitamaraþoni í Silfurbergi í Hörpu. Fram koma skólalúðrasveitir af öllu landinu og leika frá kl. 11:00 - 18:00. Blásarasveitirnar okkar stíga á svið kl. 13:00 - 13.30. Aðgangur er ókeypis og þetta því tilvalið tækifæri til að koma og hlusta á áhugaverða tónlist með áhugasömum flytjendum.  

Í lok nóvember hefjast hausttónleikar skólans þar sem hver kennari fyrir sig (eða fleiri saman eftir fjölda nemenda) heldur tónleika með sínum nemendum. Nánari upplýsingar um stund og stað fá nemendur hjá sínum kennurum.

30. nóvember kl. 16:00 mun Eyrún Huld Ingvarsdóttir, fiðlunemandi skólans leika með Sinfóníuhljómsveit áhugamanna í Seltjarnarneskirkju. Eyrúnu Huld hlaut þennan heiður, þegar hún var valin úr glæsilegum hópi fiðluleikara á lokatónleikum Nótunnar í Hofi á Akureyri sl. vor.

14. og 15. desember kl. 14:00 og 16:00 báða dagana, mun eldri blokkflautusveit Tónlistarskóla Árnesinga leika með Sinfónlíuhljómsveit Íslands á jólatónleikum sveitarinnar. Þetta er einstaklega spennandi verkefni og mikil tilhlökkun að spila með hljómsveitinni á Eldborgarsviði Hörpu.

Eldri strengjasveit hefur það sem fasta venju í desember, að halda svonefnda kertatónleika í Listasafni Árnesinga í Hveragerði. Þetta eru sérlega notalegir tónleikar þar sem tónlistin fær að njóta sín í mildri birtu kertaljósa og týra af ýmsu tagi. Tónleikarnir verða að þessu sinni haldnir miðvikud. 18. desember kl. 20:00 og eru allir hjartanlega velkomnir.

Síðustu tvo kennsludagana fyrir jólafrí fellur niður öll hefðbundin kennsla, en í staðinn fara kennarar með nemendur í heimsóknir á hjúkrunarheimili, í leikskóla, leika á litlu jólum grunnskólanna, á fundum, í verslunum o.fl. o.fl. Því miður náum við ekki að fara með alla okkar nemendur svona út í bæ, en kennarar hafa í nógu að snúast. Þetta tónleikahald getur verið hvenær sem er í desember, allt eftir því hvað hentar á stöðunum sem við heimsækjum. - Það er mjög ánægjulegt að geta með þessu móti opnað skólann út í samfélagið og glatt samborgarana.